Қасым-Жомарт Тоқаев Астана халықаралық форумының пленарлық отырысында сөз сөйледі, деп хабарлайды Alash.kz.
Мемлекет басшысы БҰҰ реформасына қатысты Қазақстанның ұстанымын білдірді.
– Әйтсе де, БҰҰ-ның негізгі тармақтары, әсіресе Қауіпсіздік Кеңесі әлі күнге дейін өзгерген жоқ. 80 жыл бұрын қалыптасқан институционалды құрылым мен қазіргі заман арасында үлкен алшақтық бар. Бұл жағдай ұйымның тиімділігіне және оған деген сенімге селкеу түсіреді, – деді Президент.
Қасым-Жомарт Тоқаевтың айтуынша, миллиардтаған адамның тағдырына әсер ететін аса маңызды шешімдерді санаулы ғана елдің қабылдауы дұрыс емес. Осыған байланысты Қазақстан БҰҰ Қауіпсіздік Кеңесінің құрамын кеңейтіп, оған әлемнің әр өңірінен өкіл қосу туралы ұстанымды қолдайды.
– БҰҰ өзектілігін сақтап, заман талабына сай болуы үшін Қауіпсіздік Кеңесіне құрылымдық реформа қажет. Алпауыт елдер бейбітшілік пен қауіпсіздікті қамтамасыз етуге шынайы ниетті екенін нақты көрсетуі тиіс. Сонымен қатар барлық мемлекеттің территориялық тұтастығын қорғау қағидаты қатаң сақталуы қажет. Біз БҰҰ Жарғысын мүлтіксіз орындауға тиіспіз. Ұйымның негізгі принциптеріне үстірт немесе немқұрайлы қарауға болмайды. Сонда ғана БҰҰ-ға деген сенім мен құрмет қалпына келеді, – деді Мемлекет басшысы.
