Шымкентте алаяқтық пен қылмыстық жолмен келген кірісті заңдастыру фактілері бойынша атышулы қылмыстық іс бойынша үкім шықты, деп хабарлайды Alash.kz.
ORDA.KZ Telegram арнасында жарияланғандай, айыпталушылар қатарында Түркістан облысының бұрынғы білім басқармасының басшысы Ғалымжан Жұмашев пен Жамбыл облысының экс-прокуроры Нұрсұлтан Тілешов бар.
Ғалымжан Жұмашев — білім саласында түрлі лауазым атқарған, соның ішінде Білім және ғылым министрлігінде, Президент әкімшілігінде және Түркістан облысы әкімдігінде жұмыс істеген. Оның алты кәмелетке толмаған баласы бар.
Тергеу мәліметінше, Ғалымжан Жұмашев кәсіпкер Эльмира Дүйсенқызынан мектеп ашуға жәрдем беремін деген уәдемен 67 миллион теңге алған. Қаржы кейін жер телімін сатып алу арқылы заңдастырылған.
Нұрсұлтан Тілешовтің әрекеттері бойынша да жеке іс қаралды. Тергеу оның жәбірленушіге қарсы қозғалған істі тоқтатуға уәде беріп, 10 миллион теңгені алаяқтық жолмен алғанын анықтаған.
Сот Ғалымжан Жұмашевты ҚР ҚК 190-бабы («Алаяқтық») және 218-бабы («Қылмыстық кірісті заңдастыру») бойынша кінәлі деп танып, прокурордың 10 жыл бас бостандығынан шектеу жазасын сұрағанына қарамастан, оған 7 жыл 6 ай мерзімге бас бостандығынан айыру жазасын тағайындады.
Пара беру мен алу фактілері дәлелденбегендіктен, бұл айыптар бойынша іс тоқтатылды.
Экс-прокурор Нұрсұлтан Тілешовке 4 жылға бостандығын шектеу жазасы берілді. Алайда амнистияға байланысты бұл мерзім 2 жыл 8 айға қысқартылды.
Сот отырысында Ғалымжан Жұмашев тағылған айыптармен келіспейтінін мәлімдеді. Оның айтуынша, алынған ақша — пара емес, кәсіпкер тарапынан ресми түрде қайтарылған қарыз.
“Эльмирамен 17 жыл отбасындай араластық. Ол маған қарызын қайтарды. Біз қолхат ұсындық, алайда судья оны ескермеді. Енді менен 60 миллион теңге талап етілуде. Бұл — әділетсіз” деді Жұмашев.
Ол, сондай-ақ, өзіне қарсы қозғалған іс әділетсіз деп есептеп, жоғарғы сот инстанциялары ақтап шыққан жағдайда Қазақстан азаматтығынан бас тартатынын мәлімдеді:
“Егер мені ақтаса, азаматтығымнан бас тартамын. Өйткені бұл — заңсыздық. Осы іске қатысы бар прокурор мен тергеушілер жауапқа тартылуы тиіс”.
