Астанада ер адам көшедегі қыздың жамбасына қол жүгірткені үшін жауапқа тартылды, деп жазады Alash.KZ.
Желіде тараған бейнежазбада ер адамның көшеде жүрген қызға тиіскені анық көрінеді. Оқиға полицияның араласуымен аяқталды.
Пилатес жаттықтырушысы Арина, құрбысымен бірге елордалық хоккей мектебінің терезесін жуып жүрген. Сол сәтті олар видеоға түсіріп жатқан. Кадрларда терезе жуып тұрған қыздың жанынан өтіп бара жатқан жасы үлкен ер адамның жамбасынан ұстап кеткені анық байқалады. Қыздың қатты шошып, абдырап қалған сәті де, видеода көрініс тапқан.
Оқиғадан кейін Арина дереу полицияға шағымданған. Құқық қорғау органдары ер адамның жеке басын анықтап, оған қатысты "ұсақ бұзақылық" бабы бойынша іс қозғаған.
Ресми мәліметке сәйкес, күдіктінің жасы 58-де, отбасылы, алты баланың әкесі. Қазіргі таңда іс бойынша процессуалдық шешім қабылдануда.
Қоғамда қызу пікір тудырған бұл оқиға көшеде, қоғамдық орында жасалатын кез келген әдепсіз әрекетке заң тұрғысынан жауапкершілік қарастырылғанын тағы бір дәлелдеді.
