Ақмола облысында "Бурабай" мемлекеттік ұлттық табиғи паркі аумағындағы жер теліміне қатысты даулы мәселе туындап отыр. Облыстық жер ресурстарын басқару департаменті "КИК-Астана" ЖШС-мен жасалған жер пайдалану шартын жарамсыз деп тану туралы сотқа талап-арыз берген. Бұл туралы Alash.kz тілшісі Nege.Aqsha Telegram арнасына сілтеме жасап хабарлайды.
Сот ісіне аталмыш компаниямен қатар Болат Назарбаев, сондай-ақ Нұрбол, Ханболат, Хантөре және Альбина Назарбаевалар да жауапкер ретінде тартылған. Сонымен бірге Бурабай аудандық жер қатынастары бөлімі де көрсетілген.
Ауыл шаруашылығы вице-министрі Азат Сұлтановтың мәлімдеуінше, бұл іс аймақтық прокуратураның ұсынысы бойынша қолға алынған:
"Бурабай ұлттық табиғи паркі аумағында заңсыз берілген жер учаскелерін мемлекет меншігіне қайтару жұмыстары жүргізілуде. Осы жұмыстың аясында департамент тарапынан "КИК-Астана" ЖШС-не қатысты сотқа талап-арыз берілді. Алайда сот арызды қосымша материалдарды тіркеу үшін кері қайтарды. Қазіргі таңда сол материалдарды толықтырып, талап-арызды қайта тапсыру жұмысы жүріп жатыр", – делінген ресми жауапта.
"КИК-Астана" ЖШС бұған дейін "Үш Қоңыр Б.Н." деген атаумен белгілі болған – бұл Болат Назарбаевтың аты-жөнінің қысқартылған нұсқасына сәйкес келеді. Ол кезде компанияның құрылтайшысы тікелей өзі болған, ал басшылық құрамында оған жақын адамдар тұрған.
Қазір бұл компания Global Apartments Ltd компаниясына тиесілі. Оның қазіргі иелері – Ерболат Жақсылықов пен Эдгар Салдузи.
