Әзербайжан Республикасының Бас прокуратурасы Ресей билігін әрекетсіздік танытты деп айыптап, қылмыстық істің жабылып қалуына жол бермейтінін мәлімдеді. Бұл туралы Alash.kz тілшісі Minval сайтына сілтеме жасап хабарлайды.
Бас прокуратураның аға кеңесшісі Ильгар Сафаровтың айтуынша, Әзербайжан ешбір мемлекеттің ішкі ісіне араласуды мақсат тұтпайды. Алайда шетелде әзербайжандық азаматтарға қатыгездік көрсетіліп, құқықтары бұзылған жағдайда, тіпті ерекше жауыздықпен кісі өлтіру орын алса, бұл жағдайға құқық қорғау органдарының араласуы – елдің тікелей міндеті және заңды құқығы болып табылады.
"Бұл Әзербайжан Республикасының Қылмыстық-процессуалдық кодексінде де қарастырылған. Ел азаматтарының шетелде құқықтары бұзылған жағдайда, ол істер бойынша ел ішінде қылмыстық қудалау жүргізілуі тиіс", – деді Сафаров.
Сондай-ақ ол, егер кінәлілер халықаралық конвенциялар мен келісімдер аясында (олардың ішінде Ресей мен Әзербайжан қол қойған құқықтық көмек туралы Конвенция) жауапқа тартылмаса, Әзербайжан барлық заңды жолдарды қолданатынын атап өтті.
"Әрбір тарап, екінші елдің аумағында өз азаматтарына қарсы жасалған қылмыс бойынша қылмыстық істі бастауға құқылы", – деді Сафаров.
Оның айтуынша, әзербайжандық тараптың нақты әрі қатаң позициясының бір себебі – Ресей тарапынан ресми жауап пен әрекеттің болмауы.
"Біз әзірге ешкімді айыптап отырған жоқпыз, оған ұмтылып та отырған жоқпыз", – деді ол.
Сафаров Ресейдегі әзербайжандық ағайынды Сафаровтардың өліміне қатысты ресми сараптама нәтижелерінің орнына әлеуметтік желілер мен пабликтерде түрлі нұсқалардың таралуын кем дегенде кәсібилікке сай келмейтін әрекет деп бағалады.
Әзербайжан тарапы оқиғаға әділдік орнатуды талап етіп отыр.
