29 маусымда Ulysmedia порталы марқұм Шерзат Полаттың әпкесі Перизат Нұрымовамен болған сұхбатты жариялады, деп хабарлайды Alash.kz.
Өткен жылы 16 жастағы Шерзаттың жұмбақ өлімі ел ішінде үлкен резонанс тудырған еді. Араға уақыт салып, оның ағасы Нұрғанат та түсініксіз жағдайда қайтыс болды. Артынша отбасының үйі өртеніп, бұл трагедиялар бір отбасының емес, тұтас қоғамның қайғысына айналды.
Ulysmedia порталының бас редакторы Самал Ибраеваға берген сұхбатында Перизат осы оқиғаларға дейінгі өмірін күрсіне еске алды.
"Біз өте қарапайым, көпбалалы ауыл отбасынан едік. Барлығымыз медицина саласында жұмыс істедік. Анамыздың арманы – балалары ақ халатты абзал жандар болса – орындалды. Кредитіміз болса да, ішіміз тыныш еді. Біріміз-бірімізге қолғабыс етіп, баламызды кезекпен қарап, дүкенде сатушы болып, уайымсыз өмір сүріп жатқан едік", – дейді ол.
Перизаттың айтуынша, Шерзат ерекше бала болған – үйдің үміті, ананың еркесі. Оның нұрлы жүзі мен анасына деген махаббаты отбасыға шаттық сыйлап келген. Үш буын бір шаңырақ астында тату-тәтті өмір сүріп жатқанда, бірінен соң бірі келген қасірет бәрінің өмірін күрт өзгерткен.
