Эстрада жұлдызы Жолдасбек Әбдіханов ауыр жарақат алып, ауруханаға түсті. Бұл туралы ақпаратты әншінің әкімшісі Әділет әлеуметтік желіде бөлісті, деп хабарлайды Alash.kz.
Оның айтуынша, қайғылы оқиға 2025 жылғы 25 маусымда орын алған. Көпқабатты тұрғын үйдегі лифт техникалық ақауға байланысты кенеттен тоқтап, қатты сілкініс болған. Сол сәттегі соққы салдарынан әнші мойын және бел омыртқасынан ауыр жарақат алып, жедел түрде ауруханаға жеткізілген.
"Алғашқы диагноз – омыртқа-аралық дискі қозғалысы, жүйке қысылуы, мойын-бел жарақаты. Бұл – жеңіл жарақат емес. Қозғала алмауы, бас айналуы, сөйлеу қиындықтары бар.
Қазір толық тыныштықта, арнайы аппаратпен емделіп жатыр. Дәрігерлер 4–6 айға дейін белсенді жұмысқа, сахнаға рұқсат бермеді.
Соған байланысты барлық шығармашылық жұмыстары уақытша тоқтатылды. Біз оның тез сауығып, халық алдына қайта шығатынына сенеміз. Сіздердің дұғаларыңыз ауадай қажет.
Жоспарланған, уәделескен жұмыстары тоқтап қалғаны үшін - баршаңыздан кешірім сұраймыз", – әншінің әкімшісі Әділет.
