Ұлытау облысы Жаңаарқа кентіндегі аудандық ауруханада анестезия салғаннан кейін төрт баланың анасы қайтыс болды, деп хабарлайды ALASH.KZ.
Әйелдің туыстары оның өліміне дәрігерлерді кінәлап отыр және бұл алғашқы жағдай емес екенін, медициналық қызметкерлердің салғырттығынан басқа да пациенттер көз жұмғанын айтуда.
Туыстарының айтуынша, 42 жастағы Гүлнұр Жуанышбаеваға аппендицитті алып тастау отасы жоспарланған. Алайда анестезия салынғаннан кейін бірден әйелде анафилактикалық шок болған, содан кейін комаға түсіп, миы ісінген.
Ота алдында пациенттен қандағы қанттың жоғары деңгейі мен қабыну процесі анықталған. Алайда туыстарының айтуынша, аллергиялық сынама мүлде жасалмаған.
Марқұмның жақындары дәрігерлер Гүлнұрды жеткілікті түрде тексермей тұрып наркоз салғанына сенімді.
“Отаға дейін 4-5 сағат уақыт болды, ол есін біліп жатқан. Осы уақыттың ішінде оны Қарағандыға көшіруге болар еді. Өйткені біздің ауруханада қажетті жағдай жасалмаған. КЩС-картридждері жоқ, КТ аппараты істемейді, тіпті натрий хлориді, кальций хлориді сияқты қарапайым қажетті заттар да жоқ. Мұның бәрін өздері құжаттарда көрсеткен. Орталық аудандық ауруханада мұндай болмауы керек! Бұл — нағыз салғырттық”, — дейді марқұмның ағасы Мәксәт Қасқатаев.
