Шерзат Болаттың өлімі бойынша сот отырысына бірнеше куәгер келіп өз шындығын айтты, деп хабарлайды ALASH.KZ Dalanews.kz сайтына сілтеме жасап.
Алғаш болып куәгер Бекнұр Асқарбек келіп, сұрақтарға жауап берді.
Куәгер Бекнұр сотталушылардың ішінен тек Дархан мен Думанды ғана танитынын айтты.
"Дархан – менің жездемнің көршісі. Ал Думанмен бір мектепте оқығанбыз. Арамызда ешқандай жанжал не реніш болмаған. Жәбірленушілермен таныстығым жоқ. 3 қазан күні кешке жездем хабарласып, "Дархан сенімен байланысады, мың теңге салып жіберші" деді. Артынша Дархан өзі хабарласып, нөмір жіберді, мен сол нөмірге ақша аудардым. Ақшаны апам Светлананың атымен жібердім. Ол қаражаттың не үшін керек екенін айтқан жоқ. Сол күні дүкенде не болғанын білмедім, тек кейіннен естідім. Ақша аударған кезде нөмірде "Жұмабике" деген есім шықты", - деді куәгер.
Сонымен қатар, тағы бір куәгер Еркебұлан Тоқтарбай сотталушы Дархан Әскентайдың сыныптасы болып шықты. Сондай-ақ сотталушылар Тоқтаубаев Нұрбол мен Азамат — Еркебұланның жолдас баласының інілері екені анықталды.
"Дарханмен бір ауылда тұрамыз, анда-санда кездесіп тұратынбыз. Оқиға болған күні кешкісін сыныптасымыз Айдынның үйіне жиналуға уағдаласқан едік. Сол күні сағат сегіздер шамасында Дархан да келді. Біраз уақыттан соң ол кетіп қалып, он минуттан кейін қайта оралды. Қолында сыра болды. Кейін Дархан мен Айдын аздап ішімдік ішті. Сағат он жарымдарда көлігімді жөндеп бітіріп, үйлерімізге қайтуға жиналдық. Жол бойындағы Менделеев көшесіндегі дүкеннің қасында Дарханды түсіріп кеттім. Ол маған тек дүкен жаққа апарып тастауды сұрады, өйткені үйі сол маңайда болатын. Көлікте отырған кезде біреумен сөйлесіп, "мың теңге жіберші" деп жатқанын естідім", деді Еркебұлан Тоқтарбай.
Ол дүкеннің маңында болған оқиғаны кейінірек әлеуметтік желіден естігенін жеткізді.
Сотта оқиғаға қатысты тағы бір куәгер — сотталушының сыныптасы, Талғар аудандық полиция басқармасының патрульдік полиция қызметкері Жәнібек Әмірақын да жауап берді.
"Жедел кезекшіден Менделеев көшесінде төбелес болып жатқаны туралы хабарлама түсті. Оқиға орнына барғанымызда, бұрылыста адамдар тобымен сөйлестім. Сол жерде жерде қанды көрдім. Куәгерлер бір баланың пышақталғанын, оны әкесі емханаға апарғанын айтты. Барлығын кезекші бөлімге баяндадым. Кейін күдікті көліктерді анықтап, тағы да кезекшіге хабарластық. Сол кезде бір жігіт көзімізге түсті, әріптесім екеуіміз оны ұстадық. Ол өзін Әскентай Дархан деп таныстырып, "Менделеев көшесінде болдым, төбелеске қатыстым" деді. Алғашында Дарханды танымай қалдым, өйткені оның көзі ісіп кеткен еді әрі қараңғы болатын. Оның үстіне одан ішімдіктің иісі шығып тұрды", - деді Жәнібек Әмірақын.
