Қоғам белсендісі Төлжан Иманалы Сәйкен Майғазиевтің келін түсіріп жатқанына қатысты пікір білдіріп, қалың мал мәселесін қозғады, деп хабарлайды ALASH.KZ.
Белсенді өз пікірін желіде бөлісті:
Сәкен баласына қатын әперіп жатыр ғой. Қалың малына 5 миллион беріпті. Барлық пабликтер соны жарыса жазып, видеосын көрсетіп жатыр. Мен де көрдім. Біреулер 5 млнды аз десе, біреулер көп дейді. Кей жерлерде қалың мал мүлдем жоқ екен. Адамға адам жаққан ба?! Тілін безейтіндерге тақырып болса болды, келсін-келмесін безеп жатыр, әйтеуір.
Осы тұрғыда өз ойымды айтқым келіп кетті. Әр ата-ана ұл бағып өсірген соң, оған біреудің үкілеп өсірген қызын алып бергенде, басқа кәделерімен қосып, қалың малын да бергені дұрыс деп ойлаймын. “Ойбай, пәленше теңге сұрапты. Ойбай түгенше теңге бердік…” деп міндетсінбеген жөн. Сол берілген ақшаға тағы ақша қоспаса, бір тиынына ие болмайды қыз жақ. Өйткені, олар қыздың киім-кешегі мен төсек-орнын береді. Киім-кешекті қоя тұрайықшы. Оны қыздың өзі киеді. Төсек-орынға тоқталайық.. Оның ішінде ағашы бар, техникасы бар, көрпе-жастығы, ыдыс-аяғы бар. Оның сапасына қарай бағасы да әртүрлі болады. Сол төсекке сенің ұлың да бірге жатып, сол көрпені бірге жамылып, сол ыдыстан бірге ас-ауқатын ішеді. Кейін өз немерелерің де соны пайдаланады. Сондықтан берген пәленше сома қалың малың қайтадан өз үйіңе келеді. Мына қымбатшылық заманда қалың малдың ақшасы аса көп дүниеге жете қойиайды-ау. Қазіргі орташа ставка 2-3 млн емес пе?! Қыз жақ одан артық ақша жұмсамаса, кем жұмсамайды.
Мен де жуырда үлкен қызымды наймандарға бердім ғой. Оларда да қалың мал жоқ екен. Той малы деп 300 мың тг берді. Бірақ мен 3 млнға жасау жинап жатырмын. Бұл тағы менің шама шарқыма қарай, туған-туыстарымның қолдауымен жиналып жатқан дүние. Ас та төк ештеңе жоқ, ағашы, техникасы, көрпе-жастығы, ыдыс-аяғы бар қарапайым төсек-орын, - деп жазды қоғам белсендісі.
