Түркия жағалауында жойқын жер сілкінісі болды: 69 адам жарақат алды, 1 жасөспірім қаза тапты, деп хабарлайды ALASH.KZ.
Астана уақытымен 3 маусым күні сағат 4:17-де Эгей теңізінде 5,8 магнитудалы жер сілкінісі тіркелді.
Эпицентрі Мугла қаласынан 10 шақырым қашықтықта, Мамарис ауданында орналасқан.
Жер сілкінісі сезілген аудандарда тұрғындар үйлерінен жаппай көшеге шығып, түнді сыртта өткізуге мәжбүр болған.
Мугла провинциясының губернаторы Идрис Акбийык зардап шеккендердің барын растады. Оның айтуынша, 14 жастағы жасөспірім көз жұмған. Жарақат алғандардың көбі паника кезінде биіктіктен секіріп, әртүрлі дене жарақаттарын алған.
«Қазіргі таңда 69 азаматымыздың жарақат алғаны белгілі. Фетхие ауданында жер сілкінісі салдарынан 14 жастағы бала ауруханаға жеткізілгенімен, дәрігерлердің барлық әрекетіне қарамастан оның өмірін сақтап қалу мүмкін болмады», – деді Идрис Акбийык.
Билік өкілдерінің айтуынша, инфрақұрылым мен ғимараттарда айтарлықтай бүлінулер болмаған.
