Бүгін таңертең, шамамен сағат 08:00-де Астанадағы Министрліктер үйінің 11-подъезінде өрт шықты. Алдын ала мәлімет бойынша, белгісіз ер адам Оқу-ағарту министрлігі орналасқан кіреберіске кіріп, турникетке қарай жанғыш сұйықтық құйып, от қойған, деп жазады Alash.KZ.
Куәгерлердің айтуынша, ер адам ғимаратқа еркін кіріп, қауіпсіздік қызметінің көзін ала беріп, оқиғаны санаулы секундтарда жүзеге асырған. Алайда жағдайға жедел әрекет еткен Төтенше жағдайлар департаментінің қызметкерлері өртті алғашқы өрт сөндіру құралдарының көмегімен дереу сөндірді.
Қуанышқа орай, зардап шеккендер жоқ. Ғимарат ішіндегі қызметкерлер эвакуацияланған жоқ, себебі өрт ауқымды болмаған және уақтылы ауыздықталған. Қазіргі уақытта оқиға орнында құқық қорғау органдары мен арнайы қызметтер жұмыс істеуде. Күдікті ер адам дереу ұсталып, тергеу амалдары басталды.
Ішкі істер министрлігі оқиғаның мән-жайын анықтап жатыр. Белгісіз адамның мұндай әрекетке не себеп болғаны әзірге белгісіз. Ресми ақпараттар қосымша хабарланатын болады.
