Мәжіліс депутаты Бақытжан Базарбек Сара Назарбаева қайтыс болды-мыс ақпаратқа қатысты пікір білдірді. Осы оқиғаның төңірегінде нағыз детективке ұқсас жағдай қалыптасқаны депутаттың да назарын аударған, деп жазады Alash.kz сайты Ertenmedia порталына сілтеп.
«Жалпы, түсініксіз оқиға болды. Иә, бұрынғы президенттің әйелі болса да, ол да адам ғой. Бұл жерде не құпия бар? Егер адам қайтыс болса, оны анық әрі ашық хабарлауымыз керек. Егер аман болса, оны да жасырмай жария ету керек. Құзырлы органдар халық алдына шығып, нақты мәліметті неге бермейді? Неге Сара Алпысқызының өзі халық алдына шығып, аман-есен екенін көрсетпейді? Бұл жерде түсініксіз нәрсе көп», – деді Базарбек мәжіліс кулуарында.
Депутат Қазақстанда ешбір азамат туралы, оның қоғамдағы мәртебесіне қарамай, ақпарат жасыруға болмайтынын атап өтті. Алайда әлдебіреулердің ақиқатты бүркемелеуге тырысып жатқаны байқалады.
«Сірә, осы мәліметті жария еткісі келмейтін әлдебір ықпалды күштер бар сияқты. Олар қандай мақсат көздеп отыр, неге шындықты жасырғысы келеді, түсіне алар емеспін. Егер адам шынымен тірі болса, ел алдына шығып, хал-жағдайын айтуы керек қой. Ал тиісті органдар соны растап, ресми түрде хабарласа болды. Егер адам өмірден өтсе, ол да заң жүзінде бекітілуі тиіс. Осы мәселенің жасырын қалғаны дұрыс емес, бұл қалыпты жағдайға жатпайды», – деп толықтырды депутат өз пікірін.
2025 жылдың мамыр айының ортасында әлемжеліде экс-президент Назарбаевтың зайыбы Сара Қонақаеваның қайтыс болғаны туралы ақпарат тараған.
Кейбір деректерге сүйенсек, Сара Алпысқызы Президент істері басқармасы медициналық орталығының Ұлттық госпиталінде («Совминка» деп аталып кеткен аурухана) өкпені жасанды желдету аппаратынан ажыратылғаннан кейін көз жұмған.
Артынша ресми өкілдер мұны жоққа шығарған. Тұңғыш президенттің баспасөз хатшысы Айдос Үкібай Сара Алпысқызының тірі екенін, ем қабылдап жатқанын мәлімдеп, оның қайтыс болғаны туралы хабарды негізсіз деп атады.
Медициналық мекеме де бұл мәліметті растап, науқастың емделіп жатқанын айтты, бірақ дәрігерлік құпияны алға тартып, денсаулық жағдайына қатысты нақты мәлімет беруден бас тартты.
Ресми мәлімдемеге қарамастан, Назарбаевтардың Шамалғандағы отбасылық зиратында жаңа жерлеу орны пайда болды деген сыбыстың тарауы халықтың күдігін одан сайын қоюлата түсті. Бірақ ол ақпарат та ресми деңгейде расталмады.
