Белгілі қазақстандық блогер Әли Ермағамбетов Қарағанды мен Жезқазған арасындағы тас жолда ауыр жол-көлік оқиғасына ұшырады. Апат жаңбырлы түнде, жолға кенеттен жылқылар жүгіріп шыққан кезде болған, деп хабарлайды Alash.kz @karaganda_vkurse-ге сілтеме жасап.
Блогердің айтуынша, өзі отырған көліктің жүргізушісі тоқтап үлгермей, құлыншақты қағып кеткен. Осыдан кейін көлік қарсы бағыттағы жолаққа шығып кетіп, Toyota RAV4 көлігімен бетпе-бет соқтығысқан.
«Жезқазған – Қарағанды тас жолында келе жатқанбыз. Түн, жаңбыр. Кенет жолға жылқылар жүгіріп шықты. Өкінішке қарай, құлыншақты қағып кеттік, көлік қарсы жолаққа шығып кетіп, Toyota RAV4-пен бетпе-бет соқтығысты. Қатты соққы болды. Барлығымыз тіріміз. Жылдамдық 90 км/сағ аспады. Екі жүргізуші де тежегішті басып үлгерді, бірақ соқтығыстан қашып құтылу мүмкін болмады. Мен жолаушы орнында отырғанмын. Бізге қатты жолымыз болды», — деп жазды Әли Ермағамбетов.
Абырой болғанда, апатқа түскендердің бәрі аман қалды. Көліктер айтарлықтай зақымданған. Бұл оқиға малдың жол бойында бақылаусыз жайылуына қатысты мәселені тағы да күн тәртібіне шығарды.
