Астанада 22 маусым күні кәмелетке толмаған қызды аңдыған адамға қатысты ақпарат тарады, деп хабарлайды Аlash.kz.
Астана қаласында кешкі сағат 17:30 шамасында шамамен 30 жастағы белгісіз ер адам 13 жастағы қызды аңдыған. Ізіне түскен адам бүлдіршін қыз мінген №61 автобуста болған, кейін Сығанақ көшесіндегі аялдамадан бірге түскен.
Куәгерлердің мәліметіне қарағанда, ер адам жасөспірімге жақындап, оны сұлу деп атап, танысуға әрекет жасаған. Содан соң қыздың қыр соңынан қалмай еріп, Құлтегін көшесіндегі үйіне дейін барған. Жарты сағатқа соңынан ерген.
Қазіргі уақытта полиция оқиға орнына жақын маңда орналасқан бейнебақылау камераларын зерделеп, күдіктінің жеке басын анықтап жатыр. Әзірге оның нақты кім екені белгісіз.
Қыздың артынан ерген ер адамның әрекеттері бейнежазбаға түсіп қалған. Видеоматериал құқық қорғау органдарына табысталды. Полиция бұл дерекке қатысты ресми тергеу жүргізіп жатыр.
