Елордада бір топ баланың автокөліктерді қиратып жатқан видеосы әлеметтік желіде тарады, деп хабарлайды Alash.KZ порталы Azattyq Rýhy порталына сілтеп.
Кадрларда жасөспірімдер көліктердің төбесіне шығып, секіріп, терезесін шағып, рулін жұлып, дөңгелегін лақтырып жатыр.
Полиция болған оқиғаға түсініктеме беріп, қазір қылмыстық іс қозғалғанын атап өтті.
«Астанада қоршалған құрылыс алаңында тұрған бірнеше автокөлікті зақымдаған кәмелетке толмағандардың жеке басы анықталды. Белгілі болғандай, көлік құралдары жақын маңдағы үйлердің тұрғындарына тиесілі және ұзақ уақыт бойы сол жерде тұрған. Бөтеннің мүлкіне зиян келтіру фактісі бойынша қылмыстық іс қозғалды. Қазіргі уақытта көлік құралдарының иелеріне келтірілген материалдық залал белгіленіп жатыр», - деп хабарлады полициядан.
Тергеу нәтижесі шыққан кезде, балалардың ата-аналары жауапқа тартылады. Сондай-ақ, жасөспірімдердің тәртібі Астана қаласы әкімдігінің жанындағы балалардың құқықтарын қорғау жөніндегі комиссияда қаралатын болады.
Полиция ата-аналарға балалардың бос уақытын бақылау және тәртіптсіздіктің салдары туралы түсіндіру жұмыстарын жүргізу қажеттілігін еске салды.
