Мәжілісте қаралған Рақымшылық туралы заң жобасына байланысты депутат Қазыбек Иса "Елбасы – Тұңғыш Президент" атауының неге әлі де қолданылып жүргенін мәселе етіп көтерді, деп жазады Alash.KZ.
Мәжіліс отырысында Қазыбек Иса Рақымшылық туралы заң жобасындағы 4-бапқа назар аударып, сол бапта рақымшылық қолданылмайтын адамдар туралы жазылғанын атап өтті.
Оның ішінде, нақтырақ айтқанда, 13-тармақ бойынша, Қазақстан Республикасының Тұңғыш Президенті – Елбасының өміріне қол сұғушылық мәселесі де осы тізімге енген.
– Бұл жерде бір түсініксіз жағдай туындап отыр, – деді депутат. – Елбасы атауы алғаш рет 2010 жылдың 20 шілдесінде небәрі 18 минуттың ішінде заңмен бекітілген болатын. Алайда 2023 жылдың 11 қаңтарында жетінші шақырылымдағы Мәжіліс бұл заңның күшін жойған еді. Онда қазіргі кезде жаңа заңдарда "Елбасы" деген сөз неге әлі күнге дейін қолданылып жүр? Неге "экс-президент" деп аталмайды? 2023 жылы қабылданған заң соңғы заң емес пе еді? Соңғы заң бұрынғы заңның күшін жоюы тиіс емес пе? – деген сұрақтар қойды Қазыбек Иса.
