ІІМ мас күйінде көлік жүргізетін адамдардың қандай қауіп төндіретінін көрсеткісі келген, деп жазады Alash.KZ.
Бүгін ішкі істер министрлігі мас күйінде көлік жүргізетін азаматтардың «әкімшілік жазаны жою туралы талабына» қатысты өз позициясын жариялап, олар азаматтарға қандай қауіп төндіретінін көрсеткен.
Ішкі істер министрлігінің ресми өкілі Шыңғыс Алекешев мас күйінде көлік жүргізген азаматтар қандай апаттарға себеп болғанын айтып, видеоларын таратқан.
«Соңғы бес жылда мас жүргізушілердің кесірінен 2,5 мыңнан астам жол-көлік оқиғасы тіркелді. 460-тан астам адам қаза тауып, 3 300-ден астамы жарақат алды. Бұл – жай статистика емес. Бұл – қайғы жұтқан отбасылар, жетім қалған балалар, перзентінен айырылған ата-аналар. Мас күйінде көлік жүргізу – жай ғана заңбұзушылық емес. Бұл – адам өміріне тікелей қауіп төндіретін әрекет. Мас жүргізуші — тек заң бұзушы емес, ол — қылмыскер, ол - тіпті кісі өлтіруші», - дейді Алекешев.
«Соңғы уақытта кейбір азаматтар көлік құралын алкогольдік немесе есірткілік мас күйінде басқарғаны үшін салынған әкімшілік жазаны жоюды талап етіп жатыр екен. Министрлік бұл талаптарды орынсыз деп санайды. Әкімшілік құқықбұзушылық туралы кодекстің 608-бабында көзделген жауапкершілікті жеңілдетуге түбегейлі қарсымыз», - деді ол.
Жұмыс істеп тұрған екі азаматты өлтірді.
Шыңғыс Алекешев алысқа бармай жуырда ғана Алматыда болған қорқынышты жол апатын еске салды.
«Мас жүргізуші жол жұмысшыларын қағып, соның салдарынан үш адамның екеуі қаза тапты. Өз қызметтерін атқарып жүрген жандардың бір сәтте өмірі үзілді. Бұл – жауапсыздықтың салдары. Мұндай әрекеттерге жол беруге болмайды. Дегенмен, қабылданған шаралар оң нәтиже бере бастады. Көлік саны өсіп жатқанымен, мас күйінде ұсталған жүргізушілердің саны азайған», - дейді ол.
