Бұл туралы Қырғызстанның Жогорку Кенеш депутаты Медер Алиев әлеуметтік желідегі парақшасында жазды, деп хабарлайды Alash.KZ.
Депутаттың айтуынша, ол қаза тапқан ер адамның ұлымен (жәбірленушімен) бұрынғы Үкімет үйінің жанында кездескен.
«Көздері алақ-жұлақ етіп тұрды, дем жетпей жатқандай болды. Қолында қағаздар бар, жаңа ғана Жоғарғы соттан шықтым дейді. Әйелі мен оның көңілдесіне 15 жыл түрме жазасы кесілгенін айтты. Бұл жігіттің аты – Эмиль, Ош облысы Қара-Суу ауданына қарасты Отуз-Адыр ауылынан екен. Ол Ресейде жұмыс істеп жүргенде, өткен жылдың 31 тамызында оның әйелін және көңілдесін әкесі ұстап алады. Олар бұл оқиғаны біреуге айтып қоя ма деп қорқып, оны өлтіріп тастаған», – деп жазды Медер Алиев.
Депутаттың айтуынша, Эмильдің үш баласы бар және ол Жоғарғы соттың үкіміне наразы.
«Әйелімнің опасыздық жасағанын қойшы, бірақ әкемді өлтірмесе болмас па еді дейді. Өте ашулы, көзі от шашып тұр, соттың өмір бойына бас бостандығынан айырмағанына наразы. Бұл істі осымен қалдырмаймын, халықаралық сотқа жүгінемін дейді», – деп атап өтті депутат.
Жоғарғы соттың баспасөз қызметі әзірге бұл іске байланысты ешқандай пікір білдірмеді.
Еске салсақ, 2024 жылғы 1 қыркүйекте милицияға 27 жастағы әйел хабарласып, абайсызда атасын өлтіріп қойғанын айтқан. Ол марқұмның арқасына бірнеше рет өткір затпен ұрғанын мойындаған. Ер адам сол үйде олармен бірге тұрған.
