Иран Израильге 100-ден астам ұшқышсыз ұшақ жіберді, деп хабарлайды ALASH.KZ.
Израиль Қорғаныс армиясының өкілі Эфи Дефриннің айтуынша, қазіргі уақытта бұл дрондарды тосып алу жұмыстары жүріп жатыр.
Ұшқышсыз ұшақтар Ираннан ұшып шығып, бірнеше сағат ішінде Израильге жетеді. Израильдік әскери сарапшылардың бағалауынша, шабуыл аралас сипатта болуы мүмкін – Ираннан «камикадзе» дрондары Израильге жақындаған кезде баллистикалық зымырандар да ұшырылуы ықтимал.
Ираннан Израильге дейін дрондардың ұшу уақыты – 7-9 сағат, ал баллистикалық зымырандардың ұшу уақыты – шамамен 12 минут.
Сондай-ақ ЦАХАЛ (Израиль Қорғаныс армиясы) мәлімдеуінше, Израиль Иранға қарсы соққы жасау үшін 200 ұшақты қолданған, олар 330-дан астам зымыран атқан.
Еске салайық, 13 маусым күні таңертең Израиль Иранға жаппай әуе соққысын жасаған болатын. Кейін Израиль әскері Иранға қарсы «алдын ала» әскери соққылар басталғанын растады. Олар бұл соққылар Теһранның ядролық нысандарына бағытталғанын және ондаған нысанның жойылғанын мәлімдеді.
