Басы дауға қалған қайырымдылық қордың жетекшісі Перизат Қайратқа қатысты қылмыстық іс алдағы күндері прокуратураға, содан кейін сотқа жолданады, деп жазады Alash.KZ.
Бұған дейін Қаржы мониторингі агенттігі (ҚМА) Перизат Қайраттың қылмыстық іс материалдарымен танысу процесін әдейі созып жүргенін мәлімдеген болатын. Сол себепті оған 9 маусымға дейін мерзім берілген еді.
ҚМА төрағасының орынбасары Жеңіс Елемесов журналистерге берген сұхбатында күдіктінің белгіленген мерзімге үлгергенін хабарлады:
«Іс материалдарымен танысу аяқталды. Қазір бізден келіп түскен өтініштер мен оларға жауаптарды жинақтап жатырмыз. Жақын күндері істі прокуратураға тапсырамыз, содан соң — сотқа жібереміз», — деді ол.
Еске салайық, Перизат Қайрат пен оның анасы Ғайни Алашбаеваға күдік келтіріліп отыр. Жәбірленушілер саны — 100-ден астам адам.
Перизат үш жарым миллиард теңгені жымқырды деп айыпталуда. Бұл қаражат су тасқынынан зардап шеккен қазақстандықтарға және соғыс құрбаны болған палестиналықтарға көмек ретінде жиналған.
Сондай-ақ, іс материалдарында мүмкіндігі шектеулі балаларға арналған оңалту орталығын ашуға жиналған қаражат туралы да айтылады.
