Ішкі істер министрлігі мас күйінде көлік жүргізгендерге қатысты жазаны жеңілдету бастамасына қарсы екенін мәлімдеді. Бұл туралы ведомствоның ресми өкілі Шыңғыс Әлекешов Оrtcom.kz алаңында өткен брифингте айтты, деп жазады Alash.KZ.
Министрлік өкілінің айтуынша, Әкімшілік құқық бұзушылық туралы кодекстің 608-бабы бойынша жауапкершілікті жеңілдету – орынсыз.
ІІМ бұл ұсынысты қолдамайтынын нақты білдірді.
"Мас күйде көлік тізгіндегені үшін 7 жылға жүргізуші куәлігінен айыру жазасы 2020 жылы бекер енгізілген жоқ. Бұл – жолдағы қауіпсіздік пен адам өмірін қорғауға бағытталған шешім", – деді Шыңғыс Әлекешов.
ІІМ деректеріне сүйенсек, соңғы бес жыл ішінде мас жүргізушілердің кінәсінен 2,5 мыңнан астам жол-көлік оқиғасы тіркелген. Соның салдарынан 460-тан астам адам көз жұмып, 3300-ден астамы түрлі жарақат алған.
Әлекешов бұл санаттағы жүргізушілерді "қылмыскер", тіпті "кісі өлтіруші" деп сипаттап, қоғамға үлкен қауіп төндіріп отырғанын ескертті.
"Бұл жай ғана заң бабы емес, жолдағы өмір мен өлімнің арасындағы нақты шекара", – деп түйіндеді министрлік өкілі.
