«Лайықты азамат» жобасы қайта басталды – үш пәтер сыйға тартпақ, ALASH.kz.
Бүгін, 22 мамырда BI Group холдингі «Қазақстанның лайықты азаматтары» жобасының қайта басталғанын жариялады, деп хабарлайды ALASH.kz.
– Біз еліміздің үш лайықты адамына үш пәтер сыйлауды ұйғардық, – деді BI Group басшысы Айдын Рахимбаев. – Бұл жобаны бұған дейін де өткізген едік. Сонда халық арасынан жүрегі кең, нағыз батыр жандарды танығанбыз. Енді, компанияның туған күніне орай, жобаны қайта қолға алдық.
Бұған дейінгі жеңімпаздардың бірі – онкология бөлімінде жұмыс істейтін әлеуметтік қызметкер Марина Чейшвили. Ұлын қатерлі ісіктен айырған соң, өзі сияқты қиын жағдайға түскен адамдарға көмек көрсетіп келеді. Ол көп жыл бойы науқастарға жанын салып көмектесіп, жалдамалы пәтерде тұрған.
Тағы бір жеңімпаз – Мұрат Қабылбаев. Ол – 13 баланы тәрбиелеп отырған көпбалалы әке, олардың 12-сі – асыранды. Түрлі ұлт пен тағдыр иелерін бір отбасыға біріктіріп, оларға жаңа өмір сыйлаған.
– Биыл да ел ішінен жаңа қаһармандар шығады деп сенемін. Олар – үлкен әріппен жазылатын ЛАЙЫҚТЫ АДАМДАР. Егер сіздің де айналаңызда сондай жандар болса, олардың оқиғасын бөлісіңіз. Бәлкім, дәл сол адам баспаналы болар, – деді Рахимбаев.
Байқау үш кезеңнен тұрады:
1. Үміткерлерді ұсыну: 1–30 маусым аралығында Instagram-да #ДостойныйГражданин #ЛайықтыАзамат #ҮздікАзамат хэштегтерімен қатысушының оқиғасын жариялау қажет. Номинациялар: білім, медицина, экология, мәдениет, спорт, қайырымдылық және азаматтық белсенділік.
2. Қысқаша тізім: 1–15 шілде аралығында сарапшылар кеңесі 10 финалисті іріктейді.
3. SMS-дауыс беру: 15 шілдеден 5 тамызға дейін халықтың дауыс беруі арқылы үш жеңімпаз анықталады.
