Алматы облысындағы Сорбұлақ су қоймасы маңында 25 шілдеде радардан жоғалып кеткен Қорғаныс министрлігіне қарасты EC-145 әскери тікұшағын іздеу жұмыстары тәулік бойы күшейтілген режимде жүргізілуде.
Бұл туралы ҚР Қорғаныс министрлігінің баспасөз қызметіне сілтеме жасап Alash.kz ұлттық порталы хабарлайды.
Іздеу-құтқару операциясына шамамен 400 адам, 70-тен астам жерүсті техникасы, 21 жүзу құралы, 10 дрон, эхолоттар, су асты сканерлеу құрылғылары мен арнайы үйретілген иттер жұмылдырылған.
Операцияға жетекшілік етуді Қарулы күштердің Әуе қорғанысы күштерінің қолбасшысы, авиация генерал-майоры Асқар Ызбасов тікелей жүргізіп отыр.
Іздеу жұмыстарына тартылған күштер мен құралдар құрамы:
- Қорғаныс министрлігі: 193 әскери қызметкер, 4 дрон, 25 техника, 8 жүзу құралы. Ауа арқылы шолу жұмыстары жүргізілуде.
- Төтенше жағдайлар министрлігі: 87 маман, 22 техника, 10 жүзу құралы, 7 дрон, 2 эхолот, сүңгуірлер және 2 кинологиялық топ.
- Ішкі істер министрлігі: 102 қызметкер, 30 техника.
- Акимат: 2 автокөлік, 3 жүзу құралы.
Құтқарушылар су қоймасының барлық аумағын, оның ішінде қолжетуі қиын және терең учаскелерді толық зерттеуде. Тіпті түнгі уақытта да жұмыс тоқтамайды.
Жоғалған экипаж мүшелерінің туыстарымен үнемі байланыс орнатылып, іздеу жұмыстарының барысы туралы жедел ақпарат беріліп жатыр.
Қорғаныс министрлігі іздеу-құтқару жұмыстары нақты нәтиже алынғанға дейін тоқтамайтынын мәлімдеді.
Еске салайық, жұма күні Луговойдан ұшып шыққан әскери тікұшақ Отар маңында радардан жоғалып кеткен болатын.
Жедел іздестіру жұмыстарына ТЖМ күштері мен “Қазавиақұтқару” мекемесінің екі тікұшағы тартылды.
Сол күні кешкісін Сорбұлақ көлі маңында күмәнді дақ байқалып, кейінірек тікұшақтың бөлшектері табылған еді.
