Ақтауда демалыс базасында жалаңаш ер адамның балалар ұйықтап жатқан бөлмеге кіріп кеткені ата-аналарды шошытты, деп жазады Alash.kz ұлттық порталы.
Ақтау қаласы маңындағы демалыс базаларының бірінде болған оқиғаға байланысты ата-аналар полициядан нақты әрекет күтетінін мәлімдеді.
Оқиға 26 шілде күні түнде тіркелген. Белгілі болғандай, демалыс орнында Ақтау жүгіру клубының қатысушылары мен олардың отбасылары демалып жатқан.
Кешкі уақытта ересектер 8 және 10 жастағы екі қызды бөлек бөлмеге ұйықтатып қойған. Алайда түн ортасында күтпеген жағдай орын алған.
– Таңғы сағат 04:00 шамасында 10 жастағы қызым айқайлап бөлмеден жүгіріп шықты. Шошып қалған, көзі алақ-жұлақ. Айғайды естіп, жақын маңда жүрген ер адамдар жетіп келіп, бөлмеге кірген. Сол кезде төсекте жалаңаш ер адам жатқанын көрген. Ол орнынан атып тұрып, терезеден секіріп, қашып кеткен. Кейін бүкіл база бойынша іздеу жүргізілді. Біз бірден полиция шақырдық, – дейді қыздардың туыстары.
Алдын ала мәліметке сәйкес, бөлмеге кірген жалаңаш ер адам сол демалыс орнында болған демалушылардың бірі болған. Медициналық сараптама оның жеңіл дәрежеде мас болғанын растаған.
Ата-аналардың айтуынша, жәбірленуші тарап екі отбасының атынан ресми түрде полицияға арыз түскен.
– Сараптама оның мас болғанын растады. Бірақ ол кәмелетке толмаған балалардың бөлмесіне қалай кіріп кетті? Неліктен ол мүлде жалаңаш болған? Бұл сұрақтарға жауап жоқ. Полиция бұл жерде қылмыстық құрам жоқ деп отыр. Сонда бұл адам жазасыз қала ма? Егер балаларға одан да ауыр нәрсе жасалса ше? Қыздар қатты қорқып қалды, бұл оқиға олардың психологиялық жағдайына кері әсер етті. Біз бұл адамның психотроптық зат қолданғанын тексеруді және заң аясында жауапқа тартылуын талап етеміз, – дейді ата-аналар.
Қазіргі таңда іс материалдары бойынша тексеру жүргізіліп жатыр.
