Қостанайда жол апатына себеп болып, оқиға орнынан қашқан мас жүргізуші ұсталды, деп жазады Alash.kz ұлттық порталы.
26 шілдеге қараған түні TANK 300 автокөлігін басқарған 57 жастағы ер адам мас күйінде жол апатын жасап, оқиға орнынан бой тасаламақ болған. Бұл туралы облыстық полиция департаменті хабарлады.
Ресми мәліметке сәйкес, ер адам бағдаршамның қызыл түсіне тоқтамай, алдымен қоршауға, кейін ВАЗ-2115 көлігіне соғылған. Кейін жол-көлік оқиғасына қарамастан, оқиға орнынан кетуге әрекеттенген.
Полиция жүргізген тексеру барысында оның орташа дәрежеде мас екені анықталды. Куәгерлер жолда жүйесіз қозғалған көлікті GTA ойынындағы көрініспен салыстырған.
Құқықбұзушыға Әкімшілік құқықбұзушылық туралы кодекстің төрт бабы бойынша хаттама толтырылды. Көлік айып тұрағына қойылып, жүргізуші медициналық айықтырғышқа жеткізілді. Іс материалдары сотқа жолданды.
