Naiza ұйымының жеңіл салмақтағы бұрынғы чемпионы, жеңіліссіз қазақстандық файтер Әліби Ідіріс (10-0) The Ultimate Fighter (TUF) турнирінде жеңіске жетіп, UFC президенті Дана Уайттың назарын өзіне аударды, деп хабарлайды ALASH.kz.
TUF 33 жобасының бесінші эпизодында Әліби америкалық лагерьде өзбекстандық тәжірибелі қарсыласы Фурқатбек Ёкубовпен (15–4) күш сынасты. Жекпе-жек барысында Идіріс қарсыласын толық басымдықпен жеңіп, турнирдегі келесі кезеңге өтті.
26 жастағы Әліби Идіріс — Naiza FC ұйымының экс-чемпионы. Ол бұған дейін Теймур Жапаров (15–3–2), Джохар Эскиев (11–4) сияқты мықты файтерлерді жеңіп, кәсіби мансабында бірде-бір жеңіліссіз келе жатыр. 2024 жылы мамырда бразилиялық Эдилсон Сантос-жуниорды айқын нокаутқа түсіріп, жаһандық ММА қауымдастығының назарын аудартқан болатын.
Ал оның қарсыласы, өзбек файтері Фурқатбек Ёкубов кәсіпқой аренада 2017 жылдан бері өнер көрсетіп келеді. Соңғы жекпе-жегінде ол LFA-ның белді спортшысы Флавио Де Кейресті (14–5) нокаутқа түсірген еді.
Жекпе-жектен кейін Әліби команда капитаны әрі UFC-дің қос салмақтағы бұрынғы чемпионы Даниэль Кормьеге қазақтың ұлттық шапанын жауып, құрмет көрсетті. Айта кетейік, дәл осы Даниэль Кормье қазіргі уақытта қазақстандық файтердің жеке жаттықтырушысы ретінде TUF жобасында оған жетекшілік етуде.
TUF (The Ultimate Fighter) — UFC ұйымдастыратын тележоба. Мұнда қатысушылар бір ортақ базаға қоныстанып, екі командаға бөлініп жаттығып, бір-бірімен жекпе-жек өткізеді. Турнир жеңімпаздары UFC-мен кәсіби келісімшартқа қол жеткізеді. Бұл форматтан Майкл Биспинг, Тони Фергюсон, Нейт Диас, Роберт Уиттакер, Келвин Гастелум сияқты әлемдік жұлдыздар шыққан.
ALASH.kz жаңалықтарды назарда ұстаңыз!
