Қазақстан мұсылмандары діни басқармасы мұсылман қауымға ескерту жасап, GTA, Counter-Strike 2, Dota 2, League Of Legends, Minecraft және genshin Impact сияқты ойындарды ойнауға тыйым салды. Бұл жайлы Alash.kz ұлттық порталы Курсив сайтына сілтеме жасап хабарлайды.
ҚМДБ бірқатар компьютер және ұялы телефон ойындарын ойнауға тыйым салды. Мазмұнында зорлық-зомбылық, кісі өлтіру, соғыс, құдайға қарсы немесе дінді мазақ ету көріністері бар барлық ойынды ойнауды шектегенін ескертті.
Мүфтияттың сөзіне қарағанда, ойынның ішінде құмарлыққа бастайтын элементтер болмауға тиіс.
"Ойында құмар ойын элементтері болмауы керек. Құранда "Уа, Аллаға сенгендер! Мас ететін сусындар, құмар ойындар, пұт – бұл шайтанның істері. Одан аулақ болыңыз!” делінген.("Әл-Маида" сүресі, 90-аят)", – деп түсіндірді мүфтият.
Діни басқарма Counter-Strike 2, Dota 2, GTA секілді ойындарда зорлық-зомбылық элементтерінің бар екенін, ислам нормаларына сай емес контенттерден тұратынын жеткізді.
Мұсылмандарға Ислам қағидаттарына сай келмейтін ойындарды ойнауға біржолата тыйым салынғанын атап өтті.
"Ал логикалық, миды дамытатын, ақпараттық ойындарға рұқсат етілген деп саналуы мүмкін. Пайғамбардың хадисін еске алайық: "Жүрегімізді мезгіл-мезгіл демалтып тұрайық, бірақ демалыс рұқсат етілген деңгейден асып кетпесін”. Яғни ойындар арқылы демалуға болатындығын көреміз", – деп қосты ҚМДБ.
Ескерте кетейік, мүйтият жалпыкомпьютерлік ойындар ойнауға шектеу жоқ екенін еске салды. Бастысы дінге қайшы келмейтін, құмарлық элементтері мен балағат сөздер жоқ болса болды. Сондай-ақ көп уақыт арнамау керек.
