Ақтөбе облысында құдыққа құлаған 9 жасар қызды құтқарамын деп қаза тапқан спортшы Нұрбол Бердіғалиевтің артында қалған әйелі мен 6 баласына көмек қажет. Бұл туралы журналист Ақырыс Сейітқазы өзінің әлеуметтік желіде парақшасында жазды, деп хабарлайды Alash.kz ұлттық порталы.
“Бірнеше күннен бері бүкіл Қазақстан Ақтөбе облысының шалғай ауылында қаза тапқан бапкер Нұрбол Бердіғалиевті қайғыра еске алуда. 9 жасар қызды қоқыс толы құдықтан шығарамын деп, өмірін құрбан еткен талантты бапкер, адал азаматтың қазасы ешкімді де бей-жай қалдырған жоқ.
Нұрболдың жаназасына берісі Ақтөбеден, әрісі өзге облыстардан келген достары мен әріптестерінің, шәкірттері мен замандастарының есебі болмады. Бердіғалиевтер әулетіне көңіл айтып, қолдан келгенше көмек көрсетіп жатқан жандар да өте көп.
Облыстық спорт басқармасы мен жергілікті спорт қауымдастық өкілдері, жанашыр азаматтар, ел ағалары барынша қол ұшын беріп, қаржылай көмек жолдауда. ҚР Туризм және спорт министрі Ербол Мырзабосынов, Тимур Құлыбаевтың Halyk қоры алақандай ауылда еңбек еткен бапкердің қазасына орай көңіл айту жеделхаттарын жолдады. Мұның бәрі қазадан қан жұтқан жанұяның көңіліне аз да болса демеу...
Бірақ Нұрболдың артында қалған алты баласына әлі де қолдау қажет. Әсіресе, баспана мәселесі шешілмей тұр. Себебі, Нұрбол Бердіғалиев 2017 жылы Байғанин ауданының орталығынан Жарлы ауылына көшіп барады. Сол жақта жаттықтырушылық жұмысқа тұрып, 2019 жылы «Дипломмен ауылға» бағдарламасы бойынша үй алған. Бұл үйдің ақшасы әлі төленіп жатқандықтан, баспана ресми түрде Нұрболдың атына өткен жоқ. Демек, қазір марқұмның алты баласы тұрып жатқан үй әлі мемлекет меншігінде. Байғанин ауданының әкімдігі осы мәселеге назар аударса деген өтініш бар!
Нұрбол Бердіғалиевтің артында 2014, 2015, 2018, 2019, 2022, 2025 жылдары туған алты бала жетім қалды! Ең кіші қызы бес айдан енді асқан сәби. Алты бала үшін бұл отбасы мемлекеттен 94 мың теңге жәрдемақы алады. Марқұмның әйелі бала күтімімен үйде отыр, жұмыс істемейді. Күні кешеге дейін отбасын Нұрболдың өзі алға сүйреп келді.
Көзі тірісінде Нұрбол ешкімнен қол жайып, көмек сұраған емес. Керісінше, бапкерге берілетін азғантай жалақының берекесін тауып, өзінің алты баласынан бөлек, қол астында жаттығатын жас спортшылардың жағдайын жасап отырған. Шәкірттерін жарысқа жетелеп, спорттық киімдерін әперіп, жазғы демалыста шомылуға апарып, қызықты кештерді жиі ұйымдастыратын. Одан бөлек, жақын достарына қолқа салып, жарыста жеңімпаз атанған жас балуандарын ынталандыру мақсатында ақшалай сыйақы да алып беретін.
Марқұмның әйелінің айтуынша, Нұрбол алақандай Жарлы ауылынан жұлдыз шығарамын деп, қатты армандапты. Шәкірттері Қазақстан чемпионатында жүлде алып, республикалық «Ауыл спорты» жобасында топ жарған. Ол Байғаниннен әлем, Олимпиада чемпионын шығарамын деген арманмен көз жұмды...
Балуанның жайын балуаннан артық кім түсінеді? Азғантай ғұмырында қазақ спортына үлес қосып үлгерген Нұрбол Бердіғалиевтің отбасына Ақтөбе облысының әкімі Асхат Шахаров назар аударса деген тілек бар. Аңырап қалған алты балаға облыс орталығы Ақтөбе қаласынан пәтер берілсе, марқұмның балалары шалғай ауылдан қалаға келіп, орталықта білім алса деген ой көкейімізді тесіп барады.
Сондай-ақ, «Ауыл спорты» жобасын жүзеге асыратын Тимур Құлыбаевтың Halyk қорына да сауын айтқымыз кеп отыр. Дәл осы жоба арқылы Нұрбол Бердіғалиев бірнеше баланың жұлдызын жаққан еді. Талай қиын кезеңде халыққа демеу болған қордың көмегінен марқұм бапкердің отбасы да үмітті...
Көзден кеткен адам, көңілден де кетеді ғой. Нұрболдың алты баласы қараусыз қалмаса екен... Ақтөбенің, жалпы қазақтың жомарт жігіттері үнсіз қалмаңыздаршы...”,- деп жазды журналист.
