“АҚШ Иранның ядролық нысандарына жасалған соққылары үшін жауап алуы тиіс”. Бұл туралы Иран Ислам Республикасының президенті Масуд Пезешкиан мәлімдеді, деп жазады Alash.kz ұлттық порталы.
«АҚШ-пен кездесулерімізде біз сенім жайлы айттық. Алайда іс жүзінде олар керісінше әрекет етіп, ядролық нысандарымызға шабуыл жасады. Америка бізге соққы жасады. Егер сіз осындай жағдайға тап болсаңыз, не істер едіңіз? Әрине, бұл агрессия үшін олар жауап алуы керек», - деді Масуд Пезешкиан Франция президенті Эмманюэль Макронға.
Президенттің айтуынша, түнгі шабуылдар АҚШ-тың Иранмен бейбіт диалог орнату туралы мәлімдемелерінің шындыққа жанаспайтынын көрсетіп отыр.
«Біз әрдайым халықаралық құқық аясында ынтымақтастық пен келіссөздерге дайын екенімізді айтып келеміз. Бірақ екінші тарап Иран халқының толық мойынсұнуын талап етті. Біздің халқымыз ешқашан күш пен қорқытуға көнбейді және бұл агрессияға міндетті түрде жауап береді», - деді Иран президенті.
