Алмас Нұржақып есімді кәсіпкердің эксперименттік видео түсіру туралы ойы қайғылы жағдайға ұласа жаздаған, деп жазды Alash.KZ порталы turkystan.kz сайтына сілтеп.
Электрлі сомакат тізгіндеген зат тасымалдаушы жігіт өзге адамдардың жанынан өтіп бара жатып, ағып жатқан суға «абайсызда» құлап кетеді. Сондай сәттің бірінде оған бойжеткенмен бірге кетіп бара жатқан жас жігіт көмекке келген.
Әлеуметтік желіде жарияланған видеоның соңында белгілі болғандай, бұл алдын ала жазылған сценарий бойынша ұйымдастырылған.
Абырой болғанда бозбала курьерді әупірімдеп жүріп судан шығарып алған. Оның іс-әрекетін сырттай бақылап тұрған бизнесмен қасына келіп, мән жайды түсіндірген. Сондай-ақ оның батыл әрекетін жоғары бағалап, 200 доллар ақшалай сыйлық табыстаған.
Осылайша, кәсіпкер арнайы адамның көмегімен аса қауіпті трюк жасап, көпшіліктің назарын өз контенттеріне аударуды көздеген.
Мұны көрген желі қолданушылары түрлі пікір білдірді.
«Абайлаңдар! Ойыннан от шықпасын», «Мынандай акробаттарды қайдан тауып аласыңдар?», «Маған да осындай ақша беретін адам жолықса ғой», «Құдай сақтасын!» деп жазды әлеуметтік желідегілер.
