Мысырдың Шарм-эль-Шейх курортында қайғылы оқиға орын алды — Қазақстан полициясының ардагері Ақмарал Мұханова қаза тапты.
Оқиға әуежайдың күту залында болған. Ақмарал Мұханова елге қайтуға дайындалып жатқан сәтте, жолаушылар отырған аумаққа ірі жарнамалық тақта кенеттен құлап кеткен. Ауыр жарақаттар салдарынан ол оқиға орнында көз жұмды, деп хабарлайды Alash.kz.
Сондай-ақ, тағы екі қазақстандық әйел жеңіл жарақат алып, оларға дер кезінде медициналық көмек көрсетілген.
ҚР Сыртқы істер министрлігінің мәліметінше, марқұмның отбасына қажетті консулдық және психологиялық көмек көрсетіліп жатыр. Мысыр билігі оқиғаның себептерін анықтап, тергеу жүргізіп жатыр.
Бұған дейін ҚР СІМ құрылым құлауынан бір қазақстандықтың қаза тапқанын растаған. Қазіргі таңда консул марқұмның туыстарымен байланыста болып, барлық қажетті мәселелер бойынша көмек көрсетуде.
