Оқушының мектептен тыс уақытта жасаған әрекеті үшін мұғалімді жазалау – әділетсіз шешім. Бұл туралы Мәжіліс депутаты Асхат Аймағамбетов YouTube желісіндегі Adal Adam арнасына берген сұхбатында айтты, деп хабарлайды Alash.kz.
Сұхбат кезінде журналист: "Оқушы үшін мұғалім қашанғы таяқ жей береді?" – деген сауал қойды.
Бұл сұраққа жауап ретінде Асхат Аймағамбетов бірнеше өңірде мұғалімдерді орынсыз жазалау жағдайлары тіркелгенін алға тартты:
"Алматы облысында ғана емес, басқа аймақтарда да балалардың сабақтан тыс уақытта қылмысқа баруы, төбелесуі тіркелді. Бірақ оның салдары мұғалім мен мектеп директорына артылды. Бұл – "шара қабылдадық" деген көрініс үшін жасалған әрекет. Бізде ең танымал спорт түрі – кінәліні табу. Біреуді жұмыстан шығару – шешім емес. Нақты шешім қабылданбаса, жағдай қайталана береді", – деді депутат.
Аймағамбетов ата-ананың жауапкершілігіне ерекше тоқталды:
"Бала мектеп табалдырығынан шыққаннан кейінгі жауапкершілік – ата-анада. Мұғалім сабағын өткізді, енді неге сол баланың әр қадамына жауап беруі керек? Мұғалімде де өз өмірі, отбасы бар. Оқушының тәртібі үшін мұғалімді жазалау – қисынсыз", – деді ол.
Сонымен қатар депутат Қостанай облысындағы жағдайды да сынға алды. Онда мұғалімдер жазғы демалыс кезінде өзен-көлдер маңында кезекшілікке тартылған:
«Бұл – заңды бұзу. Мұғалімнің демалысына қол сұғу – заңсыз. Мен бұл шешіммен келіспеймін», – деді Асхат Аймағамбетов.
Еске сала кетейік, Мәжіліс депутаты Асхат Аймағамбетов мұғалімдердің қазіргі уақыттағы бет-бейнесі жөнінде маңызды сөз айтқан болатын.
