Жетісу облысы, Текелі қаласы бағытына бет алған Ескелді аудандық №6/6 жедел жәрдем бригадасы жол бойында өртеніп жатқан үйді байқап қалып, 7 адамның өмірін сақтап қалды, деп хабарлайды Alash.kz.
Құтқарушылар – фельдшерлер Ғабит Ерғаж бен Дамира Рахимова және жүргізуші Мұрат Сатеков. Олар Жетісу ауылындағы науқасты қарап болған соң, Қарабұлаққа қайтып келе жатқан сәтте Қойшыбаев көшесінде өртке оранған үйді көрген.
"Түнгі 11 шамасында шақыртуға барғанбыз. Артқа қайтып келе жатқанда бір үйдің лапылдап жанып жатқанын байқап қалдық. Оқиға орнына тоқтап, терезелерді қағып, адамдардың бар-жоғын анықтауға тырыстық. Біраз уақыттан соң ұйқылы-ояу бір тұрғын шықты. Ол үйде жеті адам бар екенін айтты", – дейді фельдшер Ғабит Ерғаж.
Медициналық бригада бір сәт те уақыт жоғалтпай, үйге кіріп, ішінде болған 5 ересек пен 2 баланы, соның ішінде 2 айлық нәрестені де сыртқа шығарып үлгерген. Сонымен қатар, үй иесінің құжаттарын да алып шығуға көмектескен.
"Абырой болғанда, ешкім күйік шалған жоқ. Бірақ бәрі қатты қорқып қалған. Кейін жақындары келіп алып кетті", – дейді дәрігер.
Кейін өрт сөндірушілер келіп, өртті сөндіргенімен, үй толықтай жанып кеткен.
