Шерзат Болат (Полат) ісі бойынша айыпталушылардың бірі — Азамат Тоқтаубаев — бұған дейін адамға шабуыл жасағаны үшін сотталғаны белгілі болды, деп хабарлайды ALASH.KZ.
Талғардағы трагедия болған күні ол үйқамақта болуы тиіс еді.
Бұл туралы Алматы облысының прокуратурасы Tengrinews.kz тілшісінің ресми сұранысына жауап ретінде хабарлады.
24 жастағы Азамат Тоқтаубаев Шерзат ісі бойынша өткен алғашқы сот отырысында орташа қауіпсіздік колониясына жеті жылға бас бостандығынан айырылғанын айтты.
Оған үкім 2024 жылғы 17 қазанда, яғни Шерзаттың өлімінен екі апта өткен соң шығарылған.
“2024 жылғы 17 қазандағы Талғар аудандық сотының үкімімен Токтаубаев А.М. ҚР Қылмыстық кодексінің 106-бабы 2-бөлігі 7-тармағы (Бұзақылық ниетпен қасақана ауыр дене жарақатын келтіру) бойынша бас бостандығынан айырылды”, – деп мәлімдеді Алматы облысының прокуратурасы.
Біз прокуратурадан: “Неліктен Шерзаттың өлімі болған күні Азамат Тоқтаубаев бостандықта жүрді?” – деген сұрақ қойдық. Міне, қадағалаушы органның жауабы:
“Тергеу барысында Талғар аудандық тергеу сотының 2023 жылғы 15 желтоқсандағы қаулысымен күдіктіге қатысты екі ай мерзімге, яғни 2024 жылғы 14 ақпанға дейін қамауда ұстау түріндегі бұлтартпау шарасы санкцияланды. Кейінірек, 2024 жылғы 6 ақпандағы тергеу сотының қаулысымен бұл шара үйқамаққа ауыстырылды”, – деп хабарлады прокуратура.
Сонымен қатар, ведомствоның нақтылауынша, прокуратураның бұл қаулының күшін жою туралы аудандық өтініші облыстық соттың апелляциялық алқасы тарапынан қанағаттандырылмаған.
