Атырау әуежайында таңқаларлық оқиға орын алды, деп хабарлайды ALASH.KZ.
Бұл туралы жергілікті белсенді, блогер Рүстем Баязиев мәлім етті.
Ол өз әлеуметтік желісіндегі парақшасында SCAT әуе компаниясы мен жолаушының арасында болған келеңсіз оқиғаны бүге-шүгесіне дейін баяндап берді.
— Алматыға бағыт алған SCAT әуе компаниясының жолаушысын бортына жібермей қойды. Бұған оның тіркелмеген жүгінің болуы себеп болған. Кейінірек күдік тудырған чемоданнан балық табылғаны анықталды.
Оқиға қоғамда қызу талқыланып жатыр. Бұл туралы алғаш болып белсенді әрі блогер Рүстем Баязиев жазды.
Оның айтуынша, әуе компаниясының қызметкерлері жолаушының атына оның келісімінсіз жүк рәсімдеген, ал бұл көлік полициясының күдігін туғызған.
- Жолаушы тек қол жүгін ғана алып келген, ешқандай багаж тапсырмаған. Бірақ оны рейстен түсіріп тастады, өйткені оның атына рәсімделген жүктің ішінен балық табылған. Ал егер ол жерде есірткі болғанда не болар еді? Оны кім тексерер еді? — деп жазды Баязиев әлеуметтік желіде.
Нәтижесінде ер адам ұшаққа отырғызылмай, әуежайда қалған.
Қазір бұл жағдай бойынша тексеру жұмыстары басталды.
