Владимир Путин Ресейдің Украинаға қарсы соғысы барысында ядролық қару қолдануына қажеттілік болған жоқ деп мәлімдеді, деп жазады Alash.kz ұлттық порталы.
«Бізді арандатқысы келді, қателікке ұрындыруға тырысты. Сіз айтып отырған (ядролық – ред.) қаруды қолдануға қажеттілік туындаған жоқ, әрі ондай қажеттілік болмайды деп үміттенемін», – деді Ресей президенті Владимир Путин журналист Павел Зарубинге берген сұхбатында.
Кремль басшысының айтуынша, Ресей Қарулы күштерінде 2022 жылы басталған істі Ресей үшін тиімді нәтиже беретін логикалық аяқталуына жеткізуге жеткілікті күш пен құрал бар.
Сондай-ақ Путин Украинамен татуласу мүмкін бе деген сұраққа жауап берді.
"Маған бұл – уақыты келгенде бәрібір болатын нәрсе сияқты көрінеді. Қанша жерден қазір ауыр кезеңді бастан өткеріп отырсақ та, бұл уақыт еншісіндегі мәселе", – деді ол.
