Scat әуе компаниясының Астана – Ақтау бағытындағы рейсінде жолаушы бортсерікке шабуыл жасаған, деп хабарлайды ALASH.KZ.
Оқиғаның куәгері болған жолаушының айтуынша, жанжал 20 сәуір күні түнгі 00:05-те ұшақ межелі жерге қонғаннан кейін болған.
Жанжалдың басталуына ұялы телефонын ұшақ салонында ұмытып кеткен ер адам себепкер болған.
Телефон есіне түскен кезде ол ұшақтан түсіп, шығатын дәлізде тұрған екен. Салонға қайта кірмек болған оны бортсерік тоқтатып, ұшақтан адамдар толық шыққанша сәл күте тұруын сұраған.
Алайда ер адам бортсеріктің сөзін тыңдамай, ішке кіруге тырысып, өз дегенінен қайтпаған.
Осы кезде бортсерік телефонды өзі алып келетінін айтып, салонына қарай беттеген. Бірақ жолаушы оның артынан жүгіріп барып, қатты соққы жасаған.
— Бұл ер адам бүкіл ұшу кезінде тыныш отырды, ешқандай мазасыздық туғызған жоқ. Сондықтан біз мұндай әрекетті күтпедік. Оның бұл әрекетіне қатты наразы болдық. Жақсы болғаны — бортсерік мықты жігіт екен, ал егер оның орнында қыз болғанда не болар еді?! Әлгі ер адам ірі денелі, жұдырығын оңды-солды сермеп, қатты ашуланды. Қасында мүгедектігі бар әйел отырған, басқа жолаушылар да болды, біреу зардап шегуі мүмкін еді. Мұндай әрекетке қатаң жаза қолдану керек. Физикалық зорлық-зомбылыққа жол беруге болмайды, — деді оқиғаның куәгері.
