Батыс Қазақстан облысының Жымпиты ауылында болған қайғылы оқиғадан кейін БҚО әкімі Нариман Төреғалиев ресми мәлімдеме жасады, деп жазады Alash.KZ.
Ол жағдайды жеке бақылауына алғанын жеткізді.
Өңір басшысы қаза тапқан балалардың отбасына қажетті барлық көмек көрсетілетінін айтты.
Отбасыға жерлеу рәсімін ұйымдастыру, психологиялық қолдау көрсету, баспанамен қамтамасыз ету және басқа да әлеуметтік қолдау шаралары қолға алынады.
Естеріңізге сала кетейік, кеше Жымпиты ауылында жекеменшік үйден өрт шығып бес бала қаза тапты. Өрт кешкі уақытта тұрғын үйлердің бірінде болған. Құтқарушылар балаларды жанып жатқан үйден шығарып, аудандық ауруханаға жеткізген. Алайда оларды аман алып қалу мүмкін болмаған.
Балалардың қазасына көмірқышқыл газымен улану себеп болған.
Балалардың жасы 1 жастан 6 жасқа дейін. Олардың 35 жастағы әкесі “Демалыс орталығында", анасы жергілікті дүкенде жұмыс істеген. Бес балалы отбасы жалдамалы пәтерде тұрған. Өрт кезінде ата-анасы жұмыста болған.
