Токмак қаласында жігіт қызды өзіне тұрмысқа шығуға мәжбүрлемек болып, батареяға байлап қойған, деп хабарлайды Alash.kz.
Шу облыстық ІІБ мәліметінше, 2001 жылы туған Т.А. есімді азамат Д.А. есімді қызды алдап көлігіне отырғызып, елсіз жерге апарған.
Сол жерде ол қызды байлап, өзімен некеге тұруын талап еткен. Кейін үйіне алып барып, қызды батареяға байлап, өзі ұйықтап қалған.
Жігіт ұйықтап қалған кезде қыз өзін босатып алып, дереу милицияға барып, арыз жазған.
Оқиға орнына келген құқық қорғау органдарының қызметкерлерін көрген күдікті қашып кетпек болған, тіпті бір милиция қызметкерін көлігімен қағып кете жаздаған.
Т.А. Бішкектен табылып, ұсталды. Қазіргі таңда оған қатысты «некеге мәжбүрлеу» бабы бойынша қылмыстық іс қозғалды.
Қажетті сараптамалар тағайындалып, тергеу амалдары жалғасып жатыр.
