Қарағандыда 6 бала асырап алған отбасына қатысты жаңа деректер айтылды, деп хабарлайды ALASH.KZ.
Kazinform порталының жазуына қарағанда, Қарағанды облысының кәмелетке толмағандардың істері жөніндегі мамандандырылған ауданаралық сотында прокурор жетім балаларды патронатқа алып, оларды қорлаған отбасына қатысты қозғалған қылмыстық іс бойынша айыптау актісін оқылған.
Аталған іс бойынша отағасы, оның жұбайы және олардың үлкен қызына айып тағылып отыр.
Тергеу материалдарына сәйкес, олар патронатқа алынған алты баланы ұрып, қорлағаны анықталған. Кішігірім шалыс басса, сотталушылар балаларды қолға түскен нәрсемен ұрған.
— Айыпталушы И. кәмелетке толмаған баланы күн сайын азаптаған, яғни түрлі заттармен: оқтаумен және көсеумен сабаған. Балаларды ішінен, денесінен және басынан ұрған. Ауыр жұмыс істеуге мәжбүрлеген. Сәл бағынбаса, денесіне зақым келтірген: кілемге орап, оқтаумен ұрған. Баланың үстіне секіріп, психикалық азап келтірген. Сабақтан кейін далаға шығармай, оларды дәретханаға ғана жіберіп отырған. Балалар даладағы дәретханаға тез жүгіріп, дереу қайта оралулары керек болған. Олардың тамақтануға, әлеуметтік бейімделуге деген қажеттілігін елемеген. Бақшадағы жұмыстарды істегенде тезек арасынан шыққан құрттар мен жәндіктерді жеуге мәжбүрлеген. Түнде аулаға қуып шығып, иттің күркесінде түнеуге мәжбүрлеген. Басқа бөлмеде бөлек тамақтандырып, оларға етсіз бұқтырылған макарон ғана берген. Ал өзінің туған балаларын толыққанды тамақтандырған. Оның үстіне, тамақтану кезінде балалардың тамағына жануарлардың нәжісін қосып, оларды жеуге мәжбүрлеген, — деп прокурор Медеу Жақанов айыптау актісін оқыды.
Құжатқа сәйкес, бұл әрекеттерге толықтай отбасы қосылған. Әкесі, анасы және үлкен қызы асырап алған балаларды қатты ұрып-соққан. Сараптама қорытындысы бойынша балалардың денесінде соққының іздері анықталған. Тек бір ғана баланың басында 47 тыртық болған. Алайда, олар бұрын салынған соққы болғандықтан, жарақат қашан алынғанын дәл анықтау мүмкін емес. Бірақ балалар бұл жаралардың бәрін асырап алған отбасы мүшелері қалдырғанын бірауыздан мойындап отыр.
