Желіде Қостанай облысының Дене шынықтыру және спорт басқармасы бөлімінің басшысының балағат сөздер айтып ұрысқан видеосы тарады. Бұл туралы ALASH.KZ Stan.kz ақпарат агенттігіне сілтеме жасап хабарлайды.
Болжам бойынша, оқиға Қостанай қаласының орталық стадионында Қазақстан премьер-лигасының "Тобыл" және "Ақтөбе" клубтары арасындағы матчынан кейін болған.
Бейнежазбада Қостанай облысы әкімдігінің Дене шынықтыру және спорт басқармасындағы бөлімдердің бірінің басшысы Алмас Әбілдин стадион күзетшісімен дауласып, өзін видеоға түсіріп жатқан адамға дөрекі сөздер айтқаны көрсетілген.
Видеода ол: “мынау мені неге түсіреді?” деп боқтық сөздер айтқан.
Журналист Михаил Козачков қызметтік тергеу жүргізіліп жатқанын жеткізді.
"Бейнеде шын мәнінде Дене шынықтыру және спорт басқармасының қызметкері бар. Жағдай матч аяқталғаннан кейін, жеке уақытта болған. Қызметтік тексеру жүргізіледі. Қорытындысы бойынша, барлық тараптың іс-әрекеттеріне баға беріледі. Мемлекеттік қызметкерлер қандай уақытта болсын өздерінің мінез-құлқына жауап береді. Алайда бағалау кезінде жағдайдың жалпы мән-мәтінін ескеру маңызды", – делінген материалда.
Қостанай әкімдігі қазір бұл іске қатысты комиссия құрылып, тексеріліп жатқанын жеткізді.
