Алматыда Шапағат шағынауданында жарылыс болды. Алдын ала себебі – газ-ауа қоспасының тұтануы, деп хабарлайды ALASH.KZ.
Telegram-дағы Almaty Today арнасында жеке сектордағы үйлердің бірінде болған жарылыстың видеосы жарияланды.
Автордың айтуынша, оқиға Алматы қаласындағы Шапағат шағынауданында болған.
NUR.KZ тілшісі Алматы қаласы Төтенше жағдайлар департаментіне жүгінді.
«2 маусым күні сағат 13:55 шамасында Шапағат шағынауданының Биянху көшесіндегі үйдің құрылымдарын бөлшектеу кезінде 1949 жылы туған азаматтың мәйіті табылды.
Алдын ала мәлімет бойынша, 1980 жылы салынған саман үйдің конструкциялары газ-ауа қоспасының тұтануынан, алайда кейінгі жанусыз құлаған», – деп хабарлады ТЖД өкілдері.
Оқиға орнында жедел штаб жұмыс істеп жатыр. Алматы қаласының жергілікті атқарушы органдары, ТЖД, кинологиялық қызметтер, ТЖМ-нің Республикалық жедел-құтқару жасағы, 109 қалалық құтқару қызметі, апаттар медицинасы орталығы және өзге де өзара әрекеттесу қызметтері жұмылдырылған.
«Оқиғаның себептері мен мән-жайын жедел-тергеу тобы анықтап жатыр», – деп қосты департамент өкілдері.
Айта кетейік, 30 мамыр күні Атырау облысы Құлсары қаласында жанармай құю бекетінде жарылыс болып, оған жақын орналасқан кәсіп орталықтары отқа оранған еді. Ресми мәліметке сәйкес, оқиға салдарынан екі адам қаза тауып, тағы 14 адам жарақат алған, оның төртеуі – балалар.
