Қызылорда – Астана бағытындағы жолаушылар пойызында сұмдық оқиға орын алды, деп хабарлайды ALASH.KZ.
Пойыз 20 сәуір күні таңғы сағат 5-те елордаға келуі тиіс болған. Куәгерлердің айтуынша, Қарағанды стансасынан өткеннен кейін пойыз жолсерігі санитарлық аймақта қан іздерін байқап, еденді жуып жатқан.
Оның айтуынша, дәретхана түгел қанға боялған, бұл жолаушылардың алаңдаушылығын тудырған.
Болған жайтты анықтағысы келген қыздардың бірі қан ізін бойлап, дәретханадан бір купеге дейін апаратынын көрген. Купенің ішінде ол көрпемен бүркеніп жатқан әйелді байқап, көрпені сыпырып қалғанда, төсектің қанды екенін көрген. Сұрақтар қойылғаннан кейін белгілі болғандай, әйел пойызда өздігінен босанып қалған. Ең қорқыныштысы – босанғаннан кейін нәрестесін пойыз терезесінен лақтырып жіберген.
Дереккөздердің мәліметінше, нәрестенің мәйіті табылған. Өкінішке қарай, сәби көз жұмған.
Осы оқиғаға байланысты көліктегі полиция департаментінің баспасөз қызметі Liter.kz редакциясына төмендегідей жауап берген:
«Аталған факті бойынша тергеу жүргізілуде. Оның аясында тиісті процессуалдық шешімдер қабылданады».
Қазіргі уақытта оқиғаның мән-жайы анықталуда.
