Атырау әуежайында Fly Arystan өз жолаушысын рейстен түсіріп, қара тізімге енгізді, деп хабарлайды ALASH.KZ.
Шымкент қаласының тұрғыны Айжан Кенесова Атыраудан Шымкентке ұшпақ болған.
Тіркеу кезінде әуе компаниясының қызметкері оның жүгі ережеге сай екенін растап, оны қол жүгінің қатарына өткізуге болатынын айтқан.
Алайда тіркеу аяқталған соң, ұшаққа бет алған сәтте компанияның супервайзері оны тоқтатып: «Сіз ұшпайсыз. Сіз осында қаласыз», – деген.
Осыдан кейін әйелдің жүйкесі сыр беріп, ол бұл сәтті видеоға түсіріп, өзінің әлеуметтік желісінде жариялаған.
Алайда Айжан оны өз рұқсатынсыз жарияламауды сұраған. ALASH.kz ұлттық порталы жәбірленушінің өзіне хабарласып, постты жариялауға рұқсат алды.
Кенесова Атырауда қалатыны белгілі болған соң, оны полицияға тапсырған. Полиция қызметкерлері оны психоневрологиялық диспансерге, кейін наркологиялық мекемеге жеткізген.
Екі сараптама да оның қанында алкоголь болмағанын және психикалық жағдайы қалыпты екенін көрсетті.
Сондай-ақ, Айжан Кенесованы Fly Arystan компаниясы ішкі қара тізімге — яғни, ұшуға тыйым салынған жолаушылар қатарына енгізген. Бұл тізімге әуеде қауіп төндіруі мүмкін жолаушылар кіргізіледі.
— Бұл өте ұят тірлік болды. Мені күйзеліске жеткізді, қорлады. Барлығы жұрт көзінше орын алды. Осы оқиғадан кейін маған Fly Arystan рейстерімен енді ұша алмайтынымды хабарлады, — деді Айжан.
Жүкке келер болсақ: Айжанның айтуынша, ол алдын ала 10 кг қол жүгін төледі және чемоданы компания бекіткен өлшемдерге толықтай сай келген.
Ол Fly Arystan-ның арнайы тексеру рамкасымен түскен суретін де ұсынды, онда чемодан оңай сыйып тұрғаны көрінеді.
Әйел адам компанияға ресми шағым жіберіп, қызметтік тексеріс жүргізуді, өзін тізімнен алып тастауды және билет құнын қайтаруды талап етті.
Егер бұл талаптар орындалмаса, ол сотқа жүгінетінін мәлімдеді.
Ал Fly Arystan бұл жағдайға әзірге ресми пікір білдірген жоқ.
Осы оқиғадан кейін әлеуметтік желілерде Айжанға қолдау толқыны басталды.
Себебі бұған дейін де дәл осындай себептермен рейстен шеттетілген және әділетсіздікке ұшыраған жолаушылар көп болғаны белгілі болды.
