«Сені түнде ұйықтатпаймын!» – Пойызда орын алған алымсақтық дерегі қоғамда алаңдаушылық туғызды. Жаңа адамдар қозғалысы зардап шеккен қызбен тілдесті, деп хабарлайды ALASH.kz.
Алымсақтық тек түнгі көшелерде ғана емес, күндізгі уақытта, адамдар көп жиналатын қоғамдық орындарда да кездеседі. 13 сәуір күні әлеуметтік желілерде №076ХА (Қызылорда–Петропавл) бағытындағы пойызда орын алған алымсақтық оқиғасы жария болды. Жол бойында пойыз жолсерігі жолаушы қыздың аяғынан ұстап, қолынан тартып, вагоннан вагонға соңынан еріп жүрген. Тіпті «түнде ұйықтатпаймын» деп қорқытуға дейін барған.
Зардап шеккен азаматша — «Жаңа адамдар» қозғалысының белсенді мүшесі. Ол оқиғаны дереу әлеуметтік желі арқылы жария етуді жөн көрді.
Аталған қозғалыстың «Тұмар» атты азаматтық бастамасы аясында белсенділер жәбірленушімен байланысып, оқиғаның мән-жайын анықтады. Жолсерік ретінде қызмет атқарған азаматтың аты-жөні – 1992 жылы туған Жанибек Абдикаликов екені белгілі болды. Оқиға жарияланғаннан кейін, ол жәбірленушімен хабарласып, кешірім сұраудың орнына, өзінің әрекетін ақтап, қыздың «бәрін дұрыс түсінбегенін» алға тартқан.
Ең алаңдатарлығы — оқиға кезінде вагонда көптеген жолаушылардың болғаны. Алайда қыз көмек сұрағанда, ешкім көмекке ұмтылмаған. Бұл – қоғамда үнсіздіктің қалыпты жағдайға айналғанын көрсетеді. Айналасында не болып жатқанын көрмеген кейіп танытып, терезеге немесе телефонға үңілу — мұндай әрекеттердің қайталануына жол ашады.
Қоғамдағы бейқамдық пен әрекетсіздік қылмыскерлерге еркіндік беріп отыр. Біз үнсіз қала отырып, зорлық-зомбылықты қалыпты жағдайға айналдырып отырмыз.
«Жаңа адамдар» қозғалысы барлық жәбірленушілерді құқық қорғау органдарына жүгінуге шақырады. Қорықпаңыздар, үнсіз қалмаңыздар. Мұндай адамдардың аты-жөні мен түр-сипатын бүкіл ел білуі тиіс.
