30 маусым күні Түркияның құқық қорғау органдары “Мұхаммед және Мұса пайғамбарларды бейнелеп, қоғам наразылығын тудырды” деген айыппен төрт карикатуристі қамауға алды, деп хабарлайды Alash.kz ұлттық порталы.
CNN телеарнасының мәлімдеуінше, басында сәуле, арқасында қанаты бар мұсылман және еврей ер адам бір-бірімен қол алысып тұрған карикатура саяси сатиралық басылымда жарияланған. Сурет астында бомбалардың құлап жатқаны бейнеленген.
Карикатура шыққаннан кейін небәрі төрт күн ішінде әлеуметтік желілерде кең таралып, оның салдарынан Ыстамбұлдың әйгілі туристік көшелерінің бірінде жүздеген адам жиналып, “Аллаһу Акбар” деп ұрандатып, елде шариғат заңдарын енгізуді талап еткен. Түрік билігі жағдайға жылдам реакция білдіріп, журнал редакциясын қатаң сынға алды.
Ішкі істер министрі Али Ерликая бұл карикатураны “арандатушылық” деп атады:
Бұл іске батылы барғандар заң алдында жауап береді. Бұл суретті “сөз бостандығы” немесе “ой еркіндігі” қорғай алмайды.
Түрік президенті жанындағы коммуникациялар басқармасының басшысы Фахреттин Алтун бұл әрекетті:
“Біздің сеніміміз бен құндылықтарымызға жасалған жиіркенішті шабуыл” деп бағалады.
Айыпты деп танылған журналдың атауы - LeMan. Франциядағы Charlie Hebdo стилінде жұмыс істейтін танымал сатиралық басылым:
“Бұл карикатура Мұхаммед пайғамбарды бейнелемейді. Бұл шығармада “Мұхаммед” есімі — Израиль әуе шабуылдарынан қаза тапқан мұсылман азаматтың есімі ретінде берілген. Ислам әлемінде 200 миллионнан астам адам Мұхаммед есімін иеленеді. Құрбан болған мұсылманды көрсету арқылы біз зорлық көрген мұсылмандардың әділдігін бейнелегіміз келді. Бұл діни құндылықтарды мазақ ету емес. Бізге жапсырылған айыптауларды қабылдамаймыз, өйткені Пайғамбар бейнесі жоқ” деп түсіндірді.
Көтеріліс легі айыптылар ұсталғанмен де, толастамаған. Түркияның Әділет министрлігі бұл іске қатысты Қылмыстық кодекстің 216-бабы (“дінге тіл тигізу”) бойынша тергеу басталғанын мәлімдеді.
