Астананың қылмыстық істер жөніндегі соты мәдениет және спорт министрлігінің бұрынғы вице-министрі Ерлан Қожағапановты қызметтік өкілеттігін теріс пайдаланды деп танып, оны 3 жылға бас бостандығынан айыру туралы үкім шығарды, деп жазды Alash.KZ.
Қожағапанов 2018 жылы Қазақстан мен Ресей арасындағы ынтымақтастық форумын өткізу кезінде 1 млрд теңге бюджет қаражатын жымқыру ісі бойынша сотталған.
Оның сыбайласы ретінде айыпталған «Success K» компаниясының басшысы, танымал пиаршы Ләззат Көккөзоваға алаяқтық жасағаны үшін 5 жыл жаза кесілді.
Сот процесі бес айға созылды.
Ерлан Қожағапанов сотта өзіне тағылған айыпты мойындамайтынын мәлімдеп, куәгерлерге қысым жасалғанын айтып, істің объективті түрде қаралуы үшін нейрожелі арқылы қайта тексеруді талап еткен. Алайда сот оның бұл өтінішін қабылдаған жоқ.
Еске сала кетсек, биыл 7 сәуір күнгі отырыс бірқатар адвокаттық өтініштермен және Қазақстан мен Ресей арасындағы өңіраралық ынтымақтастық форумын ұйымдастыруға кеткен шығындарға қатысты дау-дамаймен өткен еді.
Мұның алдындағы сот отырыстарында Қожағапанов Антикорға шүйліккен болатын.
