Режиссер Ермек Тұрсыновты кім елге сыйдырмай жатыр?
Әшкере арнасының жазуынша, Қазақстанда өз ойын ашық айтатын адамға жүйелі, жоспарлы түрде қысым жасалады. Мұның артында нақты механизм тұр.
"Әуелі әлемжеліде адамның атына күйе жағатын ақпаратты әдейі таратады. Іле-шала айғай-шу шығып, БАҚ өкілдері министрлікке, құзырлы органдарға хат жолдайды. Осылайша, адамның соңына түсетіндер әуелі хайп тудырып алып, кейін тексеру ұйымдастырады", – деді Тұрсынов Exclusive арнасына берген сұхбатында, деп жазады Alash.KZ.
Режиссердің айтуынша, өзі де соңғы бес-алты жылда бірнеше рет тексерістен өткен.
"Антикор да тексерді, Есеп комитеті де тексерді. Ештеңе таппады. Егер шын мәнінде ұрлық жасасам, мені баяғыда жауып тынар еді", – дейді режиссер.
Тұрсынов мемлекет бөлген қаржыны көзбен көріп, қолмен ұстамағанын айтады. Ақшаның сұрауы "Қазақфильмде" деп отыр.
"Мен тек шығармашылыққа жауаптымын. Оның үстіне, мемлекет белгілеген әртүрлі салық пен ортақ шығын бар. Соның бәрін шегергенде, менің (режиссёрдің) тікелей жұмысыма тек 30-40%-ы ғана тиесілі. Оның өзі ақшалай емес, қызмет немесе жабдық түрінде беріледі", – дейді Тұрсынов.
"Мәдениет министрлігі фильмде президентті келеке қылған жері бар деген желеуді алға тартты. Мен монтажды өзгертпедім. Содан кейін кино мүлдем көрсетілмеді. Картинаны халыққа көрсете алмасам, қайдағы табыс? "Мемлекет қаржысын ұрлады, кино жоқ" деген айып, таза жала. Фильм бар, тек жарыққа шыға алмай тұр.
Екіншіден, мен президент Тоқаевтың жеке басына құрметпен қараймын, оның білімі мен мәдениетіне тәнтімін. Оған тіл тигізу ойымда болған емес", – дейді Тұрсынов.
Пікірінше, қазіргі билік шығармашыл қауымды толық бақылауда ұстағысы келеді. Оларды өзіне тәуелді етіп қойған. Мәдениетке өз мүлкіндей қарайды. Салдарынан өнер адамдары еркін жұмыс істей алмауда.
Тұрсыновтың айтуынша, билікке ұнамаған өнер иелеріне "сыпайы түрде" елден кетуге немесе үнсіз қалуға кеңес беріледі екен.
"Менің жағдайымда бірнеше жол бар: елден кету, үнсіз қалу немесе билікке жағу. Елден кеткім келмейді, бір рет кеттім, жетеді", – дейді ол.
Тұрсынов шығармашылық еркіндік үшін ақырына дейін күресуге бел байлап отыр. "Сөз еркіндігін қорғай алмасақ, онда бұл қоғамға шығармашылықтың да керегі шамалы", – дейді Ерекең.
