Маңғыстау облысы Мұнайлы ауданына қарасты Бесшоқы ауылында тұрғын үйлердің бірінің терезе маңынан жаңа туған нәресте табылды, деп хабарлайды ALASH.KZ.
Оқиға 5 мамыр күні таңғы сағат 09:30 шамасында болған.
Шақалақты бірінші болып ауыл тұрғыны байқап, бірден шұғыл қызметтерге хабар берген.
Бұл жағдайды Маңғыстау облыстық полиция департаменті растады.
Қазіргі уақытта баланың анасын анықтау және оның қайда екенін табу үшін жедел-іздестіру шаралары жүргізіліп жатыр.
«Аталған дерек бойынша қылмыстық іс қозғалды. Нәресте перзентханаға жеткізілді, оның өмірі мен денсаулығына қауіп жоқ», – деп хабарлады ведомствоның баспасөз қызметі.
Полиция аталған оқиғаға қатысты қандай да бір мәліметі бар азаматтарды жақын маңдағы полиция бөлімшесіне хабарласуға немесе сенім телефонына қоңырау шалуға шақырады.
